بعد ما ربنا رزقني بمريم وكبرت شوية اكتشفت انها أوقات بتكون "عصبية"!! لاااااااااء.. مستحيل!!! أنا طول عمري رافضة فكرة الطفل العصبي وخاصة إن مافيش حد في العيلة عصبي.. بدأت أركز يمكن أوصل لأسباب العصبية فوجدت إنها مش قادرة تعبر عن حاجة لأنها لسه مش بتقدر تتكلم فبتتعصب.. وكمان لما تكون زهقانة بتبتدي تعيط وتحاول تجذب انتباهنا.. وفي أوقات بتتعصب من غير سبب واضح بالنسبة لي رغم انه أكيد في سبب حتى لو السبب ده هو إن مريم متدلعة زيادة.
في كل الحالات أنا بأحاول أعالج الأسباب من غير ما أقول أمامها انها بنت عصبية، وده لإن مش معنى إنها بتتعصب فس بعض الأوقات انها تكون شخصية عصبية. ولو مش عارفة تعبر بالكلام بأسمعها وبأحسسها إنى فاهماها.. ولو محتاجة إهتمام أو زهقانة بأهتم بيها وبألعب معاها.. أما لو حسيت إن ده دلع بأتجاهلها تماماً علشان ما تتعودش على كده.
اضغطي على الصورة لمشاهدة الحلقة
أهم حاجة إن مهما مريم تتعصب لازم أنا ما أتعصبش أمامها بقدرالأمكان علشان أكون قدوة حسنة.. ومازلت بأحاول!
0 التعليقات:
إرسال تعليق